Rev 7 | KYG | STEP | Ani gemo afite'na agovana lole'e lole'e enisole vaya'mogimo ma mopafi'mo lole'e lole'e atupale'mo he ti'a mai'ne'apae'mo ma mopalenagi solovala anitenagi yosalenagi hu'a yasimo o'alisiyafe'mo ma mopa atupale'mo lole'e lole'e yasile'mo atafau'nage'na apake'nove.

Revelation of John 7

Goti'a vani hataleti foti fo tauseni'a vaya'aite'mo alagena kava'amo hu male'niya gemae

1 Ani gemo afite'na agovana lole'e lole'e enisole vaya'mogimo ma mopafi'mo lole'e lole'e atupale'mo he ti'a mai'ne'apae'mo ma mopalenagi solovala anitenagi yosalenagi hu'a yasimo o'alisiyafe'mo ma mopa atupale'mo lole'e lole'e yasile'mo atafau'nage'na apake'nove. 2 Agovana mago alu enisole vekamo'a yegemo haine ne'eya kotegati'mo afa'a ne'maiya Goti alagena kava'amo hu malesiyafe'mo aliteno e'nige'na age'nove. Agaemo lole'e lole'e enisole vaya'aife'mo Goti'a ma mopa'e solovala ani'e'mo ali'a hosu hu'a atesaya himamu'apimo alino apami'niya enisole vaya'aife'mo alopa gefati'mo keya aeno ge hu'niye. 3 Lapakaemo ma mopagi solovala aninagi yosagi hutapa alita hosu hutapa o'ate'nigetao hogoteta Gotitimo ali'ya'amo ne'aliya vaya'ai hapanile'mo alagena kava'amo hu malegaune, huno hapa pai'niye. 4 Na magi vaya'mogi Goti alagena kava'amo hapanile'mo hu male'naya vaya'mo mai'nafi huno naha pai'niye. Vani hataleti foti fo tauseni'a vaya'mo muki Isaleli nofi vayapati'mo mai'naya vaya'aite'mo alagena kava'amo hu male'nae. 5 Yuta nofi vayapati'mo tuolofu tauseni'a vaya'aite'mo alagena kava'amo hu male'nae. Lumeni nofi vayapati'mo tuolofu tauseni'a vaya'aite'mo alagena kava'amo hu male'nae. Gati nofi vayapati'mo tuolofu tauseni'a vaya'aite'mo alagena kava'amo hu male'nae. 6 Asa nofi vayapati'mo tuolofu tauseni'a vaya'aite'mo alagena kava'amo hu male'nae. Napitali nofi vayapati'mo tuolofu tauseni'a vaya'aite'mo alagena kava'amo hu male'nae. Manasa nofi vayapati'mo tuolofu tauseni'a vaya'aite'mo alagena kava'amo hu male'nae. 7 Simiyoni nofi vayapati'mo tuolofu tauseni'a vaya'aite'mo alagena kava'amo hu male'nae. Livai nofi vayapati'mo tuolofu tauseni'a vaya'aite'mo alagena kava'amo hu male'nae. Isaka nofi vayapati'mo tuolofu tauseni'a vaya'aite'mo alagena kava'amo hu male'nae. 8 Semulani nofi vayapati'mo tuolofu tauseni'a vaya'aite'mo alagena kava'amo hu male'nae. Yosefe nofi vayapati'mo tuolofu tauseni'a vaya'aite'mo alagena kava'amo hu male'nae. Menisameni nofi vayapati'mo tuolofu tauseni'a vaya'aite'mo alagena kava'amo hu male'nae.

Lusi asole vaya'mo mai'naya vaya'aife'mo hapa pai'niya gemae

9 Ani kava'mo afole aitege'na age'novana lusi asole vaya'mo lekana opaisuna agufa vaya'mo muki alu kotega alu kotegamo ne'maiya vayanagi muki nofi vayanagi muki alu apakufa'e alu apakufa'e vayanagi muki alu apake alu apakemo ne'aiya vayanagi hu'a yagaino ne'apateya vekamo sia aulagale'e aikeli sipisipimo aulagale'e'mo e'a he ti'a mai'nage'na apake'nove. Apakaemo yatala yaveyave'age kukenamo vaili'naya vaya'mogi vayave haitagana ya'mo apayapi'mo ali'nae. 10 Apakaemo alopa gefati'mo hu'apae'mo, Gotitimo'a yagaino ne'apateya vekamo sia'ale'mo fai mai'niya vekamo'e aikeli sipisipi vekamo'e'mo anakai'anige'mo lagufamo ali'ana kati'ana late'na'anagi ala lanakitanimo ali'ao, hu'a hu'nae. 11 Muki enisole vayanagi vayatama vayanagi lole'e lole'e vayanagi hu'a yagaino ne'apateya vekamo sia'ale'mo he ti'a fai'a ku ai'a ate'nae. Inagi apakaemo yagaino ne'apateya vekamo sia aulagale'mo apago'ya fai'a asagau'a aite'a apaugosalegati'mo mopale'mo ai'a ati kae'ne'a Gotife'mo mono hu'nae. 12 Apakaemo hu'apae'mo,

He lama ge. Gotitimofe'mo amuse hu'a atete'a agi'ale'mo ali'a asaga hu'a ateyo. Alagepa huno ageteno afi'niya vekae, hu'a hute'a hao ke he'a ala agi'amo amiyo. Muki ya'a'e lokiya vekamo himamu'a'e vekae, hu'a, muki afina'mo hume hume u'a maiyo. He lama ge,
hu'a hu'nae.

13 Mago vayatama vekamo'a, Yatala yaveyave'age kukenamo vaili'naya vaya'mo ina lagie. Ani vaya'mo haiyategati'mo e'nae, huno nafi ge'nige'nae'mo, 14 Ala vekae, hu'na, o'apake'nove. Kagaemo apake'nanagi naha paiyo, hu'na ha pai'nogeno naha paino'ae'mo, Kalaisi'a, lusi apaini hu'a lapatesaya afina'mo afole aigiye, huno lapa pai'niya afina'mo alopa hanageke afina'mo ago afole ai'nige'a Goti ge'amo o'atale'a e'a mai'nae. Yatala kukena'apimo aikeli sipisipi vekamo kola'aleti'mo ali'a sese hu'nageno yaveyave kukenamo hamale'niye. 15 Ani kava'mo hu'naya'mofe'mo Goti aulagale'mo yagaino ne'apateya vekamo sia aulagale'mo mai'ne'a feluga'e hani'ilaga'e'mo aote mono no'afi'mo ali'ya'mo ali'a mai'nae. Yagaino ne'apateya siate'mo fai mai'niya vekamo'a apakae'e'mo magokepi lokaeno maigiye. 16 Halate apaka otege anife'mo ohapauge hu'a maigae. Yegemo'mo leno apasaga olisigeno atamo'mo amuko ohapaugiye. 17 Na kava hinage'apaene. Aikeli sipisipimo'a yagaino ne'apateya vekamo sia'amo folagapi'mo mai'niya sipisipi vekamo'a sipisipile'mo yagai'a ne'apataya kava huno yagaino apateteno meti ani'amo'a afa'a maisaya ya'mo alino ne'apamiya anitegamo apavalelino ugiya'mofe'mae. Goti'a apaulagafati'mo apaunumo alino laneno atalegaiye, huno hu'niye.